中環出更：病入「高」肓 仲唔睇急症？
食物及衞生局局長高永文今個月月初喺立法會開會時已經開始猛流鼻水，連議員蔣麗芸都叫佢不如去打疫苗。點知事隔兩星期，高永文嘅病情未有好轉，尋日喺立法會回答質詢時把聲都沙晒，就算係咁飲水都唔掂。唔知係咪受藥物影響，佢一度連議員問咩都唔記得，仲搞到被寸嘴嘅議員鍾樹根叫佢去睇急症。高永文病到咁都仲死頂返工，唔通佢唔放心畀副局長陳肇始代勞上陣？
樹根﹕順便測試輪候時間
高永文尋日喺立法會要連續回答兩條質詢，聽見佢把聲沙晒，講嘢時又起痰又咳，差唔多每講兩句就要飲水，連向佢提問嘅議員都戥佢辛苦，個個都叫佢唔好咁勞碌，事關近日爆發多宗禽流感事件，要好好保重身體打仗。
雖然高永文帶病回答質詢，但樹根都冇畀面，仲話依家去公立醫院急症室睇病成日要輪候八至十個鐘，話高永文咁嘅狀況可以去睇急症，除低眼鏡等人認唔到佢，就可以順便親身試一試輪候時間有幾耐喇。
卓妮