《基本法》委員會副主任梁愛詩近日談論政改時，特別鍾意用比喻，包括用九八年嘅新機場大混亂，嚟形容香港落實雙普選，唔應該一次過改變太多嘢。到尋日佢就用香港主辦世貿會議時發生嘅韓農示威，比喻「佔領中環」好難保唔會演變成騷亂，又以小朋友學行嚟比喻民主路，強調世界上永遠無零風險嘅方案。小朋友學行，通常都係仆吓仆吓，之前○七○八年政改方案仆低咗，到二○一二年政改方案又企番起身通過到，唔知今次一六一七年政改，會係再次仆低定係成功穩步向前走呢？
