新一屆渣打馬拉松明年二月開跑，參賽名額增至七萬三千個，報名當日不消一會就額滿，延續渣打馬拉松年年人山人海嘅傳統。錯過咗明年渣打馬拉松嘅市民都唔使失望，因為緊隨其後，同年三月可能有首場市區馬拉松誕生，不過名額同樣有限，到時勢必又爭崩頭。
呢場市區馬拉松正籌辦得如火如荼，計劃於明年三月舉行，參賽名額預計五千人，路線橫跨九龍城同觀塘區，起點係啟德郵輪碼頭，經鯉魚門再折返郵輪碼頭，全長十公里，既為社企籌款，又可為社會帶來正能量，認真一舉兩得。
知情人士話，要辦好呢場馬拉松一啲都唔簡單，因為除咗渣打馬拉松外，未曾有類似活動喺市區舉辦，自然要走訪多個政府部門做游說。有心人話希望呢次市區馬拉松舉辦成功，成為日後舉辦類似活動嘅藍本。香港眾多長跑愛好者，好及早跑多幾轉練定氣喇！