政情：自由黨黨慶司局長冇影
我哋早前報道過，政府司局長將會集體杯葛自由黨二十周年黨慶。尋日自由黨喺會展搞黨慶酒會兼晚宴，政府高官真係一個都冇嚟，就連西環亦疑似唔畀面，只派一名部長出席，直情係將呢場暗戰搬上枱。二十周年都算大慶，面對咁嘅光景，自由黨黨魁田北俊（田少）都難掩失望，仲形容同政府嘅關係有如一曲《舊歡如夢》。之不過，自由黨舊年特首選舉冇當現屆特首梁振英（CY）係「意中人」，試問又何來「當年相戀」呢？
副局常秘快閃 田少酸溜溜
早排免費電視發牌事件，自由黨對泛民提嘅特權法動議投下支持票、自由黨出席施政報告政黨諮詢會後，又係咁批評政府，就連喺立法會辯論亦經常對政府不留情面，唔知仲以為佢哋係反對派。尋日自由黨就筵開三十席，不過莫講話CY同政務司司長林鄭月娥唔喺香港，其他司局長亦一個都冇到。而現身嘅副局長同常任秘書長十隻手指數得晒，仲要喺酒會後飯都唔食就「快閃」。中聯辦方面，副主任級以上嘅官員都冇出席，只有協調部部長沈沖到場。
田少雖然嘴巴說不介意，但面上就難掩失望神色，仲酸溜溜咁話自由黨同政府嘅關係就好似《舊歡如夢》呢首歌咁，前半段歌詞就係以前嘅關係，而後半段就係依家嘅關係。但田少就話，唔會因為政府高官唔嚟就改變佢哋嘅政策，佢哋依舊會是其是、非其非喎。田少要扮演曳仔，今次求仁得仁啦。
唐唐大輝謝偉俊坐主家席
雖然一眾司局長缺席自由黨黨慶，但前政務司司長唐英年同太太郭妤淺、人大常委范徐麗泰、立法會議員林大輝、謝偉俊同香港電視主席王維基都有出席，除咗王維基喺第二席外其他都係坐主家席，差啲以為係「倒梁」飯局。
對於政府高官唔出席自由黨黨慶，新民黨主席葉劉淑儀就話呢個唔係巧合，而係一個決定。范太亦都話覺得奇怪，佢個人就認為應該廣結善緣咁話。
十月初被形容為「敵我矛盾」嘅民主黨黨慶，林鄭月娥都有率領其他司局長到賀。今次政府嘅動作實在係落自由黨面子。自由黨喺立法會手握五票，政府咁樣示威，莫非將來唔再打算向自由黨拉票？