中環出更：94歲王霖好精靈

王霖之前已去過立法會新大樓，但帶導賞團就係第一次。佢同班小學生去完大堂影相，又去圖書館參觀，見到立法局大樓時代嘅主席椅時仲忍唔住摸下張櫈，又同張櫈影相。佢話自己做過三屆議員都冇試過同張櫈咁近距離喎。而立法會就陳列咗佢當年張議員委任證。

前立法局議員 養生有道

卓妮見王霖咁精靈，就問吓佢有咩養生之道啦。佢就話最緊要保持開心，佢依家都仲好留意時事同議會，又成日識新朋友，有人邀請佢參加活動都會盡量出席，話同朋友多啲分享，自然就開心啲喎。佢又同卓妮講，以前立法局有規有矩，依家就成日掟嘢，立法會會議又可以喺電視睇到，所以會對香港造成負面形象，仲搞到啲後生仔平時喺政府地區諮詢會都有樣學樣，真係教壞下一代咁話。

前議員方黃吉雯（右）同現任議員單仲偕（左）係唔同期嘅議員。	唐英年（左）遇上前議員曾健成（中）及霍震霆（右）。（盧志燊攝）	王霖當年張議員委任證已成為立法會嘅展覽品。

曾任議員嘅前政務司司長唐英年都有出席午宴。議員范國威就借咗隻最近大熱嘅狼公仔路福西（原名路姆西），諗住帶埋佢同唐英年合照，不過唐英年就一句「唔好玩我啦」婉拒咗。

最近有傳前財政司司長梁錦松參選特首，唐英年就話梁錦松冇向佢透露，不過佢就讚梁錦松好能幹同熱心服務社會，如果梁參選佢一定會鼓勵。至於梁錦松曾涉偷步買車，唐英年就話社會上每個人都有犯錯嘅時候，佢自己都曾僭建，相信社會會原諒知錯能改嘅人喎。

卓妮