政情：肥亨借用電視風雲 妙論傑青
商務及經濟發展局前局長馬時亨（Fred）雖已退出官場，但佢除咗好關心下屆特首係邊個，仲對時事好熟。Fred做咗十大傑出青年首席評審四年，尋日喺傑青頒獎禮上致詞時，就用電視發牌等時事穿插其間，話喺唔違反保密原則下透露兩個評審秘密，仲話佢哋係以「一籃子因素」決定邊個做傑青，一定唔會洩秘，總之妙語連珠。同場嘅行政會議召集人林煥光聽完之後向Fred豎起手指公，都算佢有氣度。
Fred話，所以講咗兩個評審秘密，第一個就係原來好多時，評審對傑青人選都有分歧，有時仲會喺顧問挑選後再加人選，所以要「日以繼夜、夜以繼日」咁做；第二個就係自己只係好似陪審團咁引導其他評審，不過討論過程講咗啲乜就唔會透露，十足十行會處理電視發牌咁。
稱梁錦松有能力做特首
有傳Fred下屆有機會選特首，佢自己尋日就話「無意圖、無企圖」，重提佢嘅港大同學、前財政司司長梁錦松有能力、有心又做過政府，出嚟選有機會贏。佢又話政務司司長林鄭月娥都有能力，咁邊個好啲？Fred就以一句「通常女人叻啲」回應。立法會主席曾鈺成就話，阿松無意選特首。