政情：唔驚中蛋 陳茂波驚記者
財政司司長曾俊華月初跟隨特首梁振英落區，「誤中副車」慘遭掟蛋，仲連累坐隔籬嘅發展局局長陳茂波（Paul）無辜被蛋汁濺中，仲係陳繼去年出席新界東北發展論壇險被掟中水樽後，第二次「受襲」，認真陰功。咁啱阿Paul尋日再次落區出席活動，但我哋眼見四周都唔覺有警方護身，睇嚟阿Paul心口掛個勇字就「真空」上陣。
阿Paul尋日應兒童發展配對基金邀請，擔任活動主禮嘉賓，我哋見阿Paul入場後神態自若，零保安貼身照顧下依然同周圍嘅嘉賓有講有笑，似乎已經擺脫咗過去兩次「受襲」嘅陰影。平日收收埋埋嘅阿Paul更罕有開金口，帶領學生唱聖誕歌《Joy to the World》晒歌喉添！
繞路避訪 做「鍵盤戰士」
雖則話阿Paul唔怕被掟嘢，但原來最怕都係記者，佢離場時特地繞過記者，選行另一條路避開記者訪問，轉過頭又見佢上載網誌，呼籲市民參與啟德發展區規劃，情願做番「鍵盤戰士」嘅老本行都怕咗迎戰記者。唔通喺佢眼中，記者仲可怕過水樽同蛋？