政情：曾鈺成譚耀宗 距離漸遠

步伐不一 並非首次

曾鈺成尋日隔空否定阿譚嘅講法，同二○一七普選特首有關。民建聯日前舉行周年黨員大會，會上阿譚話好多朋友鼓勵民建聯派人參選來屆特首選舉，仲話民建聯係芸芸政黨中，最有條件成為執政黨嘅，所以無理由唔派人出戰。阿譚話相信民記黨員都好認同呢番說話，所以希望民記手足繼續努力，把民建聯朝住執政黨目標進發。

正當阿譚雄心壯志鼓動黨員，隔咗未夠一日，曾鈺成即刻出嚟「倒米」，用一大盆冷水兜頭淋，真係置主席顏面於不顧。曾鈺成尋日被傳媒問及民記做執政黨一事，曾鈺成即刻爽快咁話，民建聯能否做執政黨，除咗睇民建聯本身實力，仲要視乎本港政治制度，唔係話做就做。曾鈺成後來索性畫公仔畫出腸，好老實，話如果民建聯現時要成為執政黨，睇怕係脫離現實。

其實，兩位民記大佬「步伐」不一都唔係第一次，幾個月前曾鈺成曾經發表「心魔」論，一度遭傳統左派圍攻口誅筆伐，當時捱批嘅曾鈺成大吐苦水，話點解做建制派就唔可以講民主呢？仲自爆有民建聯內部兄弟話佢變咗民主派。但譚耀宗喺另一場合答記者時，就斬釘截鐵話未聽過呢啲講法，暗示話曾鈺成變咗民主派嘅唔係自己。不過民建聯內仲有邊個咁有地位，令曾鈺成將佢放在心上然後引述為「內部兄弟」？就真係得佢兩兄弟至知嘞。

身份唔同 顧忌迥異

一個係黨主席，時時刻刻要顧住個黨。一個係有意為立法會主席賦予「言論自由」，對問題勇於表達鮮明立場，而唔再好似以往嘅立法會主席一樣，對所有問題唔表態。可能就係因為現實，令民建聯兩位頭面人物，漸行漸遠。