政情：呂鈞堯添孖女 靠韓親「濟」奶
保良局前主席呂鈞堯（Quincy）月前添咗一對孖女，尋日中午喺君悅舉行百日宴，新舊保良人大包細包到賀。Quincy揀奶粉首選韓國貨，事關佢太太Miyoung係韓國人，外父加埋親戚好友，幾乎每周飛韓國一次，講笑話靠佢哋「接濟」，香港鬧奶粉荒都無有怕。
精靈的小孖女叫做呂知恩（Katie）及呂知映（Grace），尋日穿上可愛公主裙亮相，任憑場內閃光燈閃不停，孖女依然大覺瞓，乖巧到極。Quincy已有兩歲幾大嘅囝囝，今次再為人父，心情雙倍興奮，佢笑言呢日何止百日宴，直頭係二百日宴，因為孖女帶畀佢雙重喜悅。咁高興，好少開金口嘅佢上台高歌多首中外「飲歌」，多位前總理同好友都輪流上台唱不停。
辦百日宴 好友爭請教
Quincy又捉埋太太真情剖白，坦言「養兒方知父母恩」，唔做過爸爸，都唔知湊大仔女原來咁辛苦，以後會加倍痛錫父母。喜宴上有唔少韓籍親友，呂太Miyoung悉心安排一味韓式泡菜，等親友食得更滋味。佢哋又為囡囡改名花盡心思，事關有啲中文字，韓文係無嘅。左諗右諗，終於諗到「知恩」同「知映」兩個名。一對孖女稍後會跟媽咪返韓國擺百日宴，感受韓國情懷。
雙喜臨門，唔少好友爭住請教生孖胎秘笈，Quincy話，阿爺嘅兄弟有生孖胎基因，可能佢遺傳咗優良傳統，所以今次「打孖上」，純粹好運，無秘方。呂爺爺及呂嫲嫲都好開心，為孫女送上金器，期望孫兒快高長大，健康活潑。Quincy就呼籲好友將賀禮捐畀保良局慈善基金，愛心爆棚。
卓妮