政情：孫穎買貨倉博升值
買磚頭，一向係女人投資首選，但樓市吹淡風，買樓風險高，名人圈開始流行買貨倉。精於置業嘅「鋼琴公主」孫穎，早前曾出書教女人投資，唔使靠男人。私底下，佢坐言起行，年前開始四出物色貨倉，月前就斥資二百六十萬元，喺屋企附近嘅火炭工業區掃入一個近千呎嘅貨倉自用。佢話個貨倉近屋企，搬運物件慳水慳力，個貨倉將用來放置衣服、手袋等，咁屋企就可以騰出更多空間喇。
孫穎話，多年來收到唔少好友送贈藝術品，份份背後都有故事，點捨得丟吖。佢曾經諗過買埋屋企隔籬單位打通，但諗深一層將豪宅變貨倉，並唔划算。由於佢六年前曾經購入一個觀塘貨倉，持貨幾年，賺咗一倍，加上眼見唔少貨倉升值潛力不菲，一於再入貨。咁買貨倉有乜秘訣呢？孫穎話，第一要交通方便，鄰近鐵路沿線；第二係要乾淨、企理，間隔有窗，確保空氣流通，放置嘅雜物先無咁易發霉喎。