政情：善用廚餘 煮出經典
為咗向下一代灌輸惜食文化，推動消減廚餘嘅「齊惜福」尋日喺中華廚藝學院大搞「綠色自助餐」，向在場六十多位小學師生宣揚珍惜食物減少廚餘嘅訊息。齊惜福項目委員會主席黃家和話，其實只要善用食材，要做到零廚餘唔係好難，而飲食業界好早就懂得物盡其用，好似經典食品「碗仔翅」同「羅宋湯」，都係由食材嘅零頭碎尾應運而生，充分展現廚師利用剩餘物資嘅功架。
黃家和話，昔日酒樓廚房為大戶人家炮製「魚翅撈飯」，總係有啲零散嘅翅頭翅尾剩餘，有人不甘食材就此浪費，於是加入肉絲、木耳及醬油，成為今日街知巷聞嘅地道食品「碗仔翅」。此外，一般食市都會將蔬菜外觀最好嘅部分奉客，而賣相稍次嘅部分則成為煲湯材料，好多茶餐廳供應嘅「羅宋湯」都係由此而來。不過，公道啲講，並唔係所有食肆都咁做，相信有啲為求質素會選用最好嘅部分。
帶小學生食綠色自助餐
尋日小學師生一齊分享嘅「綠色自助餐」，廚師就係依照物盡其用嘅原則，將食材內外每一部分皆妥善運用，例如叉燒同西蘭花嘅頭尾就用來切粒炒飯，以豬肉肉渣做碗仔翅等。當然，按量取食亦係減少廚餘嘅重要手段，因此黃家和同一眾賓客用餐後均高舉一粒飯都冇剩嘅餐碟，以示「有衣食」。所以大家只要喺煮食嘅時候花啲心思，廚餘嘅問題就得以緩解啦。
雖然食材得以盡用，但總會出現茶渣或骨頭等剩餘物資，黃家和話打算添置廚餘機來解決問題。佢話已經物色一部韓國製造嘅廚餘機，可以將殘羮剩菜轉化為有機肥料，啱晒佢於公司露台所栽種嘅植物。黃家和又話，堆填區面積有限，而廚餘就每日生產成千噸，所以惜食減廢刻不容緩喎。其實大家用餐盡量減少食剩嘢，已經係減少廚餘同減少廢物嘅一個好開始。