中環出更：直擊工展會on.cc東網名人讚又快又好睇
「上東網，知天下」，東方報業集團旗艦網站「on.cc東網」推出無耐，網站點擊率同收睇人數都節節上升，唔少政商界名人同市民都讚不絕口，話內容更新得又快又好睇。「on.cc東網」尋日就全程直擊維園工展會開鑼嘅最新消息，為準備掃貨嘅市民送上最近嘅資訊，就連主辦單位中華廠商聯合會會長施榮懷（Irons）及副會長吳永嘉（Jimmy）都讚嘆「on.cc東網」「真係快成咁！」有攤檔負責人仲希望「on.cc東網」可以幫手吸引市民入場添！
尋日工展會開鑼，Irons同Jimmy就聯同一班副會長、會董們主持升旗禮儀式，唔夠半個鐘，「on.cc東網」就已經火速上載有關嘅報道。
Jimmy睇完報道即大讚「on.cc東網」話︰「真係快成咁，工展會未開幕，東網報道已捷足送上，好有效率喎！」之後佢哋等候開幕禮嘉賓到場時，亦企埋一齊拎住手機睇「on.cc東網」，一路睇一路讚好。
搶先報道即場資訊
「on.cc東網」為咗令市民可以盡快睇到最新資訊，於是全程直擊工展會開幕，由開幕禮、特首梁振英（CY）夫婦同高官行工展會、買膠鴨產品，以及主辦單位推出嘅一蚊燕窩、一蚊鮑魚、一蚊海味福袋等購物優惠都即時搶先報道。
卓妮經過CY參觀嘅有機食品社企檔戶「土作坊」，於是就問吓佢哋有冇睇「on.cc東網」啦，攤檔負責人陸小姐就第一時間話︰「梗係有睇啦！」佢仲話，CY朝早十點鐘先到工展會，未夠十一點已經喺「on.cc東網」睇到CY喺佢哋攤檔買嘢嘅報道，真係多得「on.cc東網」報道，佢哋個攤檔先咁多人嚟幫襯咁話。
卓妮