政情：袁彌明要劏騸雞
候任新聞統籌專員馮煒光在獲委任當日迅速辭去南區區議會海怡西議席，引來各政黨爭相插旗，原本泛民主派協調派出立法會議員單仲偕（騸雞）出選，對撼新民黨小花陳家珮，但有傳喺協調機制外嘅人民力量主席袁彌明（Erica）亦有意加入戰團，仲以狙擊白鴿黨為首要目標，變成泛民鬼打鬼，隨時令建制派冷手執個熱煎堆贏得議席。
前白鴿黨中常委馮煒光喺上屆選舉以十二票之差擊敗教育局政治助理、當時仲係新民黨黨員嘅施俊輝。依家馮煒光走去做官，白鴿黨自然想順理成章奪回議席，仲派出老鴿騸雞收復失地。雖然騸雞口話未決定選唔選，但據聞佢一早已經做好咗十幾頁嘅海怡半島未來報告，仲入晒信箱派畀當區居民，而前晚中委會亦已經通過由佢代表黨出戰。
白鴿被轟「不知所謂」
不過，原來人民力量林雨陽都有參加上屆區議會海怡西選舉，得票喺四位候選人中排行第三，據聞佢有意捲土重來，或派出Erica挑戰騸雞。Erica接受查詢時承認，人力有意派人出選海怡西，未來幾日就會定出最後人選，亦唔排除由佢出選。Erica批評，馮煒光當年代表黨出選海怡，但依家竟然為做官而背棄承諾，失信於民。佢又話，白鴿黨唔肯代馮煒光道歉之餘，仲要派人搶番個位，只可以用「不知所謂」四個字嚟形容喎。
東涌北補選亦掀戰幔
另外，離島東涌北區議員林悅尋日因向銀行申請樓宇按揭時偽造稅單誇大收入而被判監廿一個月，雖然可以緩刑二年，但林悅仍然即時喪失區議員資格，令該議席需要補選。上次以三百幾票落敗嘅飛機師譚文豪（Jeremy）已經落戶九龍東無意再戰東涌，據聞或會改由新入黨嘅大狀余俊翔接手。至於建制派就派出羅崑頻頻落區，睇怕都係想搶頭啖湯。未來幾個月將會有兩場區議會補選，相信到時一定會好戲連場。