中環出更：震寰望爭產官司和氣收場
政商界名人臥虎藏龍，唔少仲係武林高手，好似捲入家族爭產官司嘅港區全國人大代表霍震寰（Ian），身兼香港武術聯會會長，而且練「意拳」多年，學會見泰山崩於前，依然定過抬油。近日面對姊弟接連入稟法庭興訟，Ian淡淡定話無壓力，強調同家人關係唔錯，仲有飲茶見面添，家人入稟興訟，只係對某啲遺產內容唔太清楚明白，所以搵外人畀啲指示，佢期待與家人和氣收場。
匯聚武術發燒友嘅中華國術（香港）總會前晚舉行第一屆理事局就職晚宴，數百武癡雲集。Ian一身唐裝到賀，總會會長王嘉恩同主席趙式慶親自迎接。精通空手道、泰拳及洪拳嘅趙式慶熱情地同Ian握手，愈握愈大力，Ian內功深厚，使出暗勁「扣」實對方手腕，兩人暗中較勁一分鐘，高下難分。卓妮笑言，不如來一場正式比武？Ian笑笑口話：「唔會啦，佢係高手！」
卓妮