中環出更：中大頒博士蝦碌連場
中文大學尋日舉行頒授學位典禮，當中包括頒授榮譽博士學位予粵劇名伶楊梁燕芳（芳艷芬）、恒隆集團主席陳啟宗（Ronnie）、寧波諾丁漢大學校長楊福家，以及英國牛津大學校長Andrew D. Hamilton，四人各自都有支持者出席捧場，喜氣洋洋。卓妮觀禮時仲發現好多蝦碌鏡頭，好似見慣世面嘅Ronnie，未行禮就戴定博士帽，而中大校董會主席鄭海泉（Vincent）又忘記頒發證書，莫非兩個都未瞓醒？
首個出場獲頒博士銜嘅係Ronnie，見佢一起身就戴起頂博士帽，可能現場有人提水，佢先至除低頂帽。之後佢行扑頭禮時，校董會主席Vincent扑完頭又唔記得頒發證書畀佢，就用手指打圈示意佢轉身，今次Ronnie就醒喇，企定唔郁，Vincent先醒起要頒證書。當Ronnie接過證書及轉身後，可以正式戴起博士帽，但佢一時間又搞唔清楚點戴，「舞」咗頂帽一陣先成功戴上，認真搞笑。
講番個典禮，不得不提中大喺「讚辭」話Ronnie直率敢言及勇於發聲，仲話佢嘅言論有時「甚為尖銳，得失權貴，但絕非徒託空言，無的放矢」添，唔知係咪講緊佢以前斥罵「貪曾」前特首曾蔭權爵士嘅劣行呢？不過，Ronnie喺離開時就冇「敢言」評論政事，只係向介紹佢專程嚟捧場嘅徒弟呂博士。
芳艷芬獲銜 名人齊捧場
講起徒弟，就要講吓另一頒授榮譽博士學位嘅芳艷芬，因為佢嘅唯一徒弟余蕙芬亦有捧場，另外信興集團副主席蒙德揚、前超群西餅創辦人李曾超群、醫學美容醫生陸宏隆太太蔡錦裳都到場支持。蒙德揚透露，佢細妹蒙祖兒係芳艷芬嘅新抱，所以佢哋係親戚咁話。
芳艷芬獲親友支持外，本身係醫生、又係半個音樂人嘅中大副校長霍泰輝都係芳艷芬嘅粉絲，佢話自細聽粵曲長大，最鍾意芳艷芬齣《火網梵宮十四年》，可惜無緣睇到偶像現場表演喎。
卓妮