政情：公民講場：傳提早收兵 發叔預咗輸？
新界鄉議局主席劉皇發今日會喺立法會大會提出廢除大浪西灣村納入郊野公園範圍嘅修訂，本來一眾村民眾志成城發起連串行動，首先封村，之後鄉議局再發放歷史文憲指斥港府背信棄義，其後又聲言要以馬拉松式圍堵政府總部三日，聲援發叔。
不過，呢兩日喺政總外，就只見村民數人，咁原先講過嘅過千人又喺邊呢？據聞鄉議局今日亦會改變計劃，聚集駐守立法會外嘅村民，於中午過後向議員及政府有關部門遞信，然後就會和平散去。莫非發叔已為自己嘅修訂打定輸數，所以決定提早鳴金收兵？
