政情：今日你上鏡：尊敬長輩 樹「立」榜樣

「禮儀」喺現今時代，好似變成博物館入面嘅收藏品咁，但香港大學校長徐立之尋日就充分演繹咩叫「禮儀」二字。我哋尋日喺中環香港會所門外，見到徐立之同前校長鄭耀宗食完午飯出來，門外已經泊咗架港大校長專用房車，雖然徐立之仲係現任校長，但佢表現出尊敬，一個箭步走去後座幫鄭耀宗開車門，等老人家安然上車後，自己再登上司機隔籬個位，唔識佢嘅仲以佢係保鏢。兩人有咩私交就唔知喇，但鄭耀宗當年因為「港大民調風波」而黯然下台，成為第一位因輿論壓力而辭職嘅校長，而徐立之亦因為「港大八一八事件」而自動選擇唔續約，應該有好多嘢可以分享嘅。