中菜廚師一向予人「爛撻撻」嘅形象，過去唔少父母都會告誡個女唔好嫁「廚房佬」，嚇走唔少有志入行嘅年輕人。時移勢易，隨住業界致力提升中廚形象同「錢途」，加上唔少星級中廚都有主持飲食節目，昔日嘅廚房佬已「升呢」叫做中廚師。講到星級中廚，近年頻頻同靚女主持拍住做飲食節目嘅黃永幟（幟哥），自爆當年第一次上鏡要靠「隊啤」壯膽。
幟哥憶述當年經歷確係一殼眼淚，話說當年第一次以顧問身份拍攝電視飲食節目，冇出鏡經驗嘅幟哥一埋位就「發台瘟」狂食螺絲，後來接受導演建議飲兩罐啤酒壯膽，點知連白蘭地飲清光都冇好轉，激到導演想即時易角。唔認輸嘅幟哥提議當晚請導演唱卡啦OK再飲過，第二日埋位真係得咗，順利完成拍攝。
講起本港中廚界仍有三、四萬個空缺「有工冇人做」，餐務管理協會主席楊位醒話，現時中廚起薪點已有一萬一千元，媲美唔少大學生，廚房內有冷氣，亦有進修機會，要成為年薪過百萬元嘅酒店中菜部行政總廚都唔係難過登天，呼籲有志年輕人放低成見入行喎。