政情：港大收美資搞普選網站
港府最快今日展開政改首輪諮詢，唔知係咪呢個原因，香港大學法律學院比較法與公法研究中心前總監楊艾文教授尋日開記者會，介紹佢哋新成立嘅「港人講普選」網頁。簡單啲講，網頁主要內容就係好似市面上某啲心理測驗咁，提供約二十條選擇題予網民選答，然後將大家嘅答案分別成五個主要普選特首提名嘅方案，有關意見可由網民選擇係咪提交政府。
不過，網民喺「設計」自己嘅政改方案期間，並毋須提供身份證號碼等，就算提供咗名稱，網頁亦無法核實身份，所以網民用假名都冇人會知，唔知咁樣會否令別有用心人士就個別或單一方案篤數呢？
楊艾文：旨在研究
原來港大呢個普選網頁，主要由以美國華盛頓為基地、專門支持唔同國家推廣公民參與等工作嘅National Democratic Institute for International Affairs（NDI）資助，莫非港大唔怕被人話勾結外國勢力？楊艾文話，佢哋旨在研究，而且研究數據亦毋須提交予NDI，所以完全唔會關注呢方面嘅事喎。