政情：中環出更：葉劉投訴港台 「不禮貌對待」
身兼行政會議成員嘅立法會議員葉劉淑儀上月十六日接受港台電視部節目《星期六主場》訪問時，疑受到主持麥嘉緯「不專業及不禮貌對待」，因此上月十九日去信廣播處長鄧忍光作書面投訴，事隔十日後，鄧忍光回信予葉太話明白其感受並接受批評，又希望葉太不會視節目主持嘅直率為無禮喎。
葉太尋日喺社交網站透露此次書面投訴嘅原委，佢話當日出席節目訪問時，主持未有給予足夠時間及機會畀佢作詳盡回答問題，之後到佢本人發表意見時，主持又多次以高聲掩蓋佢嘅回應，同時又發問其他問題，以致整個訪問中沒有機會表達意見，也無法作出理性及深入討論，因此去信鄧忍光投訴。
稱滿意鄧忍光回覆
葉太強調，對於鄧忍光嘅回覆感到滿意，又認為呢個節目係港台節目，由港台內部處理就可以，毋須提升向通訊事務管理局作出投訴，此舉也非針對任何人，希望日後嘉賓能在持平同客觀環境下作理性深入討論。
卓妮