政情：中環出更：黃進達情歌Encore冧爆老婆
匯聚政商界二代精英嘅廣東社團總會青委會，日前舉行十周年晚宴，城中青年團體核心成員歡聚一堂，數百賓客包括菁英會、廠商會青委、潮州商會青委及福建社團聯會青委齊到賀，籌委會主任林凱章拍住黃進達（Jason）擔大旗，除安排醒獅表演，仲有啤酒競飲比賽，氣氛高漲。不過，最高漲都係青委主任Jason再次上台高唱早前婚宴上嘅情歌，夠晒浪漫。
廣東社團青委十周年贈興
平日內斂嘅Jason當晚忽然上台高唱情歌《唯獨你是不可取替》，呢首歌係佢早前喺自己婚宴上曾唱過一次，今次再Encore，全因台下有新婚太太陳婷婷在場，婷婷又驚又喜，喺友人推動下索性走上台獻花。除太太之外，任職跨國銀行嘅細佬黃進德及當見習律師嘅妹妹黃康莉都去捧場，進德同康莉都話專注自己工作，無意投身家族旅遊生意，話交晒畀大哥打理喎。
廣東社團總會辦喜事，點少得主席王國強（KK）吖，佢細仔王紹恆（Rex）都幫手籌備晚宴，落力程度不下於爸爸。讀建築出身嘅Rex三十歲出頭，係富二代中少有「筍盤」，雖然KK曾請纓想介紹女仔畀佢識，但Rex話想事業有成先至拍拖。
卓妮轉頭又見到菁英會榮譽主席楊華勇（Johnny）拎住杯橙汁，原來佢戒緊酒，連平時最愛嘅紅酒同茅台都要暫時擺埋一邊。忽然戒酒，莫非想努力「造人」再做爸爸？Johnny笑言「造人」順其自然，但戒酒係為健康着想，清吓腸胃。
卓妮