政情：發叔斥偽泛民 製造城鄉矛盾

新界鄉議局尋日搞咗場祭抗英先烈活動，當主席劉皇發講起大浪西灣村被納入郊野公園範圍嘅問題時，不斷咁叫傳媒幫佢哋出聲，又透過副主席林偉強宣讀祭文「發炮」，聲言現今社會有唔少偽民主政客蓄意製造城鄉矛盾，撕裂社會，陷原居民於不義，又話呢啲偽民主政客以「假多數人」之名，剝奪新界幾十萬「小眾」，係「以寡暴眾」喎，呢番說話好明顯就係暗批緊同佢哋對着幹嘅立法會議員陳家洛等人啦！不過，由於林偉強誦讀得好「甩咳」，當堂冇晒氣勢，如果改由發叔或另一副主席張學明誦讀，唔知效果會唔會好啲呢？