政情：今日你上鏡：唐卡豎立維園 素玉幫手搬

唐卡被譽為藏族文化嘅藝術瑰寶，一幅十五米乘五米、約五層樓高嘅全港最大阿彌陀佛巨幅堆繡唐卡明日就會豎立喺維園六號足球場，免費畀市民瞻仰，屆時香港曬佛節創辦人阿旺．袞噶丹增嘉措寧波車都會出席，並親自祝福開幕典禮嘅參加者。呢幅特別為香港人製作嘅巨型唐卡係由中國工藝美術大師更登達吉喺西藏親自監督繪製，早前已經喺本港大帽山山頂、羌山觀音寺、屯門青賢街同大嶼山心經簡林豎立，最近立法會前議員蔡素玉仲幫手將幅唐卡搬到維園豎立。大會希望喺維園豎立唐卡可以令更多市民瞻仰，亦祈願七百萬港人以眾生為本，以世界宏觀視野觀照生命。（受訪者提供）