政情：陳振彬料泰國局勢平息
觀塘區議會主席陳振彬（Bunny）不時都會去泰國度假，但喺嚟緊聖誕節及新年，佢就話唔去泰國喇，莫非係對當地近日局勢再出現動盪而有啲擔心？原來佢係因為喺泰國設咗廠，成日都要去公幹，所以放假想去另一啲地方啫。但泰國局勢升溫，唔擔心生意受影響咩？Bunny就話，今次應該唔會好大件事，可能再過多三幾日就平息喎。一向投資有道嘅Bunny，今次又有乜理據支持佢呢個諗法呢？
Bunny分析泰國局勢，話重要一環就係留意軍方嘅取態，今次軍方並無介入事件，所以示威同抗爭應該唔會有太大作為，加上泰國總理英祿係民選產生，並得到超過七成人民支持，喺咁嘅基礎上，民間嘅聲音始終要受到正視咁話。至於佢喺今年聖誕假期，就會同家人去新加坡旅遊，咁旅程係點呢？Bunny就話一切交晒畀太太處理，佢負責去玩喎，認真幸福。