港府即將展開首階段政改諮詢，又係「搞事四人幫」出動搞局嘅時候喇！早兩日先有「民主阿婆」前政務司司長陳方安生見記者，對政改問題說三道四。尋日輪到「李漢奸」民主黨創黨主席李柱銘接力發功，接受港台電視部訪問，聲言香港政界無一個「人」係對抗中央嘅，佢又話已故中央領導人鄧小平心裏面嘅「一國兩制」，並唔係好似依家香港咁嘅。李柱銘出晒名鍾意勾結外國勢力對抗中央，唔通佢當自己唔係人？
李漢奸喺訪問中指出，李飛話香港特首必須愛國愛港，不可同中央對抗，但係佢就睇唔到香港有任何政界人士，係唔愛國愛港同中央對抗嘅。對於建制派人士質疑泛民主派提議嘅「公民提名」，會架空咗獲《基本法》授權提名特首候選人嘅提名委員會，李漢奸就反問：「就算真係架空咗提委會，又有何不可呢？」李漢奸又話，鄧小平當年構思嘅「一國兩制」，根本唔係依家香港呢回事，質疑新一代中央領導人摧毀咗鄧小平嘅「中國夢」喎，唔通佢最近同鄧小平傾過偈？