政情：貪曾眼矋矋 黑面教材
近年香港多個發展規劃項目都掀起大規模示威，令人回想本港過去行之有效的公眾參與和諮詢機制係咪失效，行政會議召集人林煥光（WK）尋日出席研討會時就此提出十項「貼士」，其中一項建議官員要有心理準備受到外間批評，千祈唔好「黑面」同「眼矋矋」。大家係咪覺得呢兩項特徵熟口熟面呢？咪係「貪曾」前特首曾蔭權爵士嘅陋習囉，估唔到WK無心插柳都寸到貪曾應一應！
指公眾參與決策要篩選
WK尋日出席由大舜政策研究中心等三個團體合辦嘅「決策中的公眾參與」研究會，顧名思義就係分享對公眾參與嘅意見，期間佢似乎吸取咗上次「深切檢討論」嘅經驗，連番強調今次言論係個人經驗分享，不代表政府或行會，但言談間都有好多有意思嘅觀點。WK首先話，公眾參與政府決策嘅心，隨社會趨現代化而增長，惟現實上難讓七百萬人齊開大會作諮詢，故參與要有篩選，但承認除核心持份者外，「最反對嘅人士都要畀佢參與。」
其後WK再從官員角度出發，形容應有轉換思維，即官員決策時應思考二十年後公眾會如何看今日嘅決策，同時對於民間提出嘅意見，也不應因未諗過而「一棍打死」，連番言論好似老生常談，但有人認為其實絕對係貪曾政府無政治能量、禍港七年嘅寫照。佢之後話鋒一轉將矛頭指向立法機關，直言支持及反對者俱應文明參與，而目前立法會有啲參與者參與態度不文明，要建立共識有困難喎。
不過，WK講就天下無敵，但尋日嘅表現就有啲瑕疵。話說在答問環節時，有參加者主動問及港府最近多次出現同民情落差好大嘅政情，包括免費電視發牌風波，然而WK竟未有開金口為政府護航，反由另一名嘉賓自告奮勇回應。會後被問及拒談事件係咪驚被行會同事批評時，WK竟稱「頭先唔覺得有講到呢個問題」，真係乜都佢講晒。