政情：親子接力跑 阿松「捨長取短」
國際小母牛香港分會尋日舉行「小母牛競步善行二○一三」活動，本身係小母牛香港分會主席嘅前財政司司長梁錦松同太太伏明霞帶埋三個仔女齊齊參加。阿松同大囝梁皓嘉仲參加咗親子二人組接力跑步比賽添！不過，搞笑嘅係阿松只係跑咗二百米就推畀皓嘉接力，好彩人仔細細嘅皓嘉最後都跑晒全程。
畀囝囝跑多啲
開跑時，卓妮見每組都係小朋友跑先，然後到爸爸媽媽跑長嗰段，點知阿松同皓嘉就調轉，問阿松點解推個波畀囝囝，佢就話︰「如果調番轉我跑長嗰段，我暈低都似！」阿松會喺二月過檔南豐集團做行政總裁，佢話揀呢份工主要都係想多啲留喺香港陪仔女，仲話自己從未掂過地產，新工有新嘢學又有糧出，真係好抵咁話，而伏明霞當然連聲讚好啦。
阿松又被問及近日頻頻見政界人士係咪為選特首鋪路，阿松就話，啲人話港人冇創意，佢就完全唔同意，覺得啲傳聞又有創意同想像力，佢仲反問大家︰「你信唔信吖？反正我就唔信喇。」