政情：中環出更：蔡加讚世紀婚禮 港澳特首到賀

每逢年尾喜事都一浪接一浪，好似「玩具大王」蔡志明嘅孻仔蔡加讚（Karson），尋晚終於同女友汪圓圓拉埋天窗。蔡家第一次娶新抱，一對新人自然獲老爺奶奶錫到燶，斥資逾千萬港元喺灣仔會展中心筵開一百六十席打造世紀婚禮，加上蔡志明喺政商界人面甚廣，喜宴上自然冠蓋雲集，就連港、澳特首梁振英及崔世安都係座上客添！
前政務司司長唐英年伉儷（左一、二）同一對新人合照。
前政務司司長唐英年伉儷（左一、二）同一對新人合照。

Karson同汪圓圓日前喺上水雙魚河馬會鄉村會所舉行婚禮，尋晚再喺會展擺酒，婚宴場地以童話式花園設計，主調為金、米及綠色，極富歐陸色彩，相當浪漫。

政商名人空群而出

恒基地產主席李兆基、新世界發展主席鄭家純、利豐集團主席馮國經伉儷、前商務及經濟發展局局長馬時亨伉儷、港區全國人大代表霍震寰伉儷、立法會議員林健鋒、葉劉淑儀都係座上客，英皇集團主席楊受成伉儷就聯同賭王何鴻燊四太梁安琪及藝人謝賢齊齊現身去飲。

馬時亨伉儷（右一、二）同前教育局局長孫明揚伉儷同時到場。
  • 馬時亨伉儷（右一、二）同前教育局局長孫明揚伉儷同時到場。
崔世安（左）特地由澳門「過大海」來港出席世紀婚禮。
  • 崔世安（左）特地由澳門「過大海」來港出席世紀婚禮。
梁振英伉儷（左一、二）亦有到場祝賀。右一、二為蔡志明伉儷。（徐家浩攝）
  • 梁振英伉儷（左一、二）亦有到場祝賀。右一、二為蔡志明伉儷。（徐家浩攝）

太子珠寶鐘錶老闆鄧鉅明（Jimmy）亦有到場恭賀兩位新人，Jimmy形容婚宴安排相當有心思，係近來少見嘅大場面，佢又盛讚一對新人係鐘錶界嘅金童玉女，更預祝二人早生貴子，皆因「生出嚟一定係靚仔靚女」咁話！

被問到送咗咩畀對新人，Jimmy笑言蔡家珠寶、鐘錶樣樣都有齊，送咩都冇意思，都係送現金最實際。

到賀嘅仲有廣東社團總會主席王國強，佢大讚蔡志明交遊廣闊，形容政商界名人尋晚簡直係空群而出。咁啱王國強都係以現金做「人情」，簡簡單單確係好。

卓妮

第一手消息請下載on.cc東網iPhone/iPad/Android/Windows Phone Apps