政情：公民講場：政府創新慢 林鄭檢討啦！

政務司司長林鄭月娥尋日出席社企民間高峰會，當佢被主持人問到政府點催化社會有多啲創意嘅時候，佢竟然好坦率咁，話呢樣嘢喺公營部門似乎有難度，皆因政府與生俱來有種rigidity and inertia（死板及慣性），仲話記得去年參加同類高峰會，好高興咁向大家宣布特首攞五億元嚟做社企基金，其後變為社企創新基金，但點知一搞就搞咗十二個月。林鄭仲話，可能係因為政府對創意及同非牟利機構合作有種無形嘅恐懼，所以社企精神一定要靠民間智慧去發展喎。林鄭本身係政務官出身，要打破官僚，一於由佢做起啦。