好似上次開會主題係講教育政策，竟然有委員建議政府安排國際學校嘅外籍學生，同本地學生「共度周末」，等可以全日用英語對話，以增強語文能力。如果真係成事，相信唔少男學生都會踴躍報名。
策發會再次證明，一班叻嘅人走埋一齊，得出嚟結果唔一定係驚天地泣鬼神。除咗建議本地學生同外籍學生「共度周末」外，有委員亦建議，學生成長時應該有專人輔導，但後生仔未必個個願意聽人訓話，又認為政府可以拍套電視劇，內容講青少年點樣規劃人生。
甚至有委員認為，為增強學生自信心，中學期間唔應該將學校分三等級（Banding），應該撈亂晒一齊教，咁先唔會有標籤作用。如果教育局局長吳克儉聽埋啲騎呢建議，香港教育就真係唔得掂！