政情：新總部大花筒 羅崇文知衰
民航署近期多次被傳媒揭發有疑似「大花筒」設備，包括在赤鱲角機場島新總部大樓設置專業舞蹈室、處長辦公室設獨立套廁等奢華設施，處長羅崇文尋日承認「知衰」，決定進行相關改動。佢話將舞蹈室嘅鏡會「冚住」，又會將芭蕾舞扶手拆下，將舞蹈室改為展覽室，至於佢嘅辦公室獨立套廁就會變成儲物室。
將舞蹈室改為展覽室
羅崇文尋日出席一個飛行培訓計劃畢業禮後，被問到新總部「大花筒」嘅指控時，就話其實新總部唔想奢華，好多傢俬都係舊總部搬過嚟。不過佢就承認個舞蹈室係工程部「睇漏咗」，原本舞蹈室個地方係配合航空教育徑之用，畀訪客透過單面鏡，睇到教育徑裏面航空交通人員模擬操作指揮塔嘅情況，但其後發現當中涉及投射嘅工程問題出錯，令嗰個地方最後闢作舞蹈室，佢「死撐」話嚴格嚟講係多用途室，畀員工入去做瑜伽減下壓。
羅崇文話，嚟緊舞蹈室會改為展覽嘅一部分，佢私人辦公室嘅獨立套廁就會變成擺放文件嘅儲物室，又話唔會有道門自己可以入去儲物室。