政情：副局頻跳船 曉暉冇諗過走
財經事務及庫務局副局長梁鳳儀前日話即將迎接人生第三次轉型，令到由上屆政府留任至本屆嘅副局長，只剩民政事務局許曉暉（Florence）同運輸及房屋局邱誠武二人。政府以前曾計劃增設文化局，並有傳由Florence擔任該局局長，如果係咁，Florence咪一樣可以轉型囉？Florence尋日就話，佢做文化局局長只係傳聞。
熱衷依家嘅工作
Florence之前由銀行界轉型到政府做副局長，本來仲有傳話佢有機會再轉型做文化局局長，可惜政府建議嘅架構，因為立法會拉布所以無通過。不過，Florence尋日出席活動後，就話佢做局長只係傳聞啫，佢都唔知有呢件事。咁有冇諗過辭職呢？Florence就話，冇諗，因為仲好熱衷依家嘅工作，又話文化、社企及體育等都係民政事務局要負責嘅事。Florence又確係自得其樂，仲成日用工餘時間出席文化同社企活動，又點會辭職呢？