政情:立會審計監察 議員頭痕

立法會政府帳目委員會成日批評政府部門財政混亂,唔識應使得使之餘仲浪費公帑,但原來佢哋對住一年一度嘅審計監察都一樣頭痛。事關秘書處近日要求議員們向獨立會計師行申報過去一年嘅發還開支詳細名目,等會計師行查吓議員們有無數錯數或者報漏數,而呢啲開支已向秘書處申領。據知雖然大部分議員都將呢份工作交畀助理做,但亦有人煩惱緊點樣填好份審計監察開支表。

報告繁複 田交議助處理

根據《立法會議員申請發還工作開支指引》,立法會議員可獲發還因履行立法會職務而須付出的開支,行政管理委員會聘請核數師,每年為全體議員進行核數工作,包括審查議員申領開支時有否依照秘書處指引、辦事處申報事項是否合理等,杜絕議員借申報制度欺騙公帑。據了解,今年度嘅審計監察已經展開,議員們本來要喺下星期一前交出審計監察報告,而秘書處更舉辦講座教啲議員助理點填份報告,不過近日秘書處決定將死線延長多一個星期,睇怕都係因為唔少議員唔識填份報告。

田北辰(田二少)話自己已經將所有瑣碎事務交畀議員助理處理,所以唔知幾時要交報告,不過佢就猛呻秘書處要求議員喺每一張收據上簽名,搞到依家每日都有一大疊單等住佢簽,名副其實簽名簽到手軟。

開公數物資難搵番出嚟

何俊賢(高佬賢)就話,雖然份表格都幾難填,但佢就比較擔心審計師去佢啲地區辦事處進行突擊檢查,到時要搵番開公數買嘅物資出嚟都咪話唔麻煩。有多次審查經驗嘅馮檢基就話嗰制度雖然係好事,但就搞到佢頭都痛埋,因為有時買咗啲物資唔知放咗去邊,次次審查都要好似尋寶咁搵番晒啲嘢出嚟喎。

多年前議員申領償還開支時,只須遵守指引中嘅發還款項制度原則作出申領就可以,就無規定議員要由核數師為議員進行核數工作。不過,民主黨涂謹申喺○四先被揭漏報匯標股份,後來又被指喺立法會支取租金津貼後無用嚟交租,畀外界質疑佢濫用公帑。經此一役之後,先至有審計監察呢個步驟。

第一手消息請下載on.cc東網iPhone/iPad/Android/Windows Phone Apps