中環出更：梁君彥爆林健鋒 打波愛食煙
綁架最近又成為政商界熱話，卓妮尋日喺青年工業家協會晚宴上，見到總商會立法會代表林健鋒（Jeffrey）同工業總會立法會代表梁君彥（Andrew）呢對孖公仔，當然上前問下兩人平時有無做足保安措施。
出街冇人認得 唔驚被綁
點知Andrew一開波就話自己無錢，要綁都綁個雙料議員林健鋒啦，隨即指住身旁嘅Jeffrey。Jeffrey似乎好敏感，聽到個「綁」字已經好大反應，仲話「咪講呢啲啦」，然後就話論身家，Andrew一定多佢好多，自己點都追唔上佢喎。至於有無請保鏢跟身，兩人就異口同聲話自己唔係富豪級數，平時行出街無人認得，根本唔使驚。
最近除咗個「綁」字成為熱話，連個「煙」字同樣榮登人氣榜，兩人都曾經係年輕工業家，唔知平時有無食番兩口煙減下壓呢？呢個時候Andrew又篤爆Jeffrey習慣，透露佢最愛打高爾夫球時食番兩支，尤其喺吞雲吐霧時用煙霧「擾亂」對手視線同心神。但高球場唔係室外嚟咩？如果「煙招」成功，似乎唔係食兩支就得喎。
卓妮