政情：林大輝借屋企女人賣口乖
家住九龍、一直被傳好想去新界東直選嘅工業界立法會議員林大輝（圖），尋日並無準時現身於十一點開始嘅立法會會議，原來佢嗰時去咗馬鞍山一個最近翻新嘅屋邨街市做開幕禮嘉賓，致辭時仲擺晒佢太太、媽媽同外母上枱添。
大輝有會唔開去街市，致辭嗰陣就話自己停留喺二十年前，覺得街市係污糟、好焗、濕淋淋同埋無管理，然後就大讚翻新咗嘅街市帶畀人不一樣嘅感受，建議家庭主婦同埋佢哋嘅另一半齊齊享受買餸體驗，聲言咁可以令家庭更和諧同美滿喎！
叫阿媽老婆外母「遠征」買餸
佢大賣口乖之後就話要趕住返立法會，不過搭車途中會打電話畀老婆、阿媽同埋外母，話第日會做一個好老公同埋孝順仔，陪佢哋老遠由九龍走入馬鞍山呢個街市買餸。其實佢提早喺新東出現都係拉票啫，又何必擺咁多人上枱呢？