政情：督促囝囝讀書 梁繼昌熄電視
早排有網民發動無綫台慶期間熄電視，抗議一台獨大，立法會議員梁繼昌（Kenneth）尋日茶敍時透露，佢都熄電視，不過就唔係為咗抗議，而係為咗九歲嘅囝囝着想。佢話佢囝囝太愛睇電視，可以睇成十個鐘，唔知係咪睇創晒個心，功課唔係做得幾好，所以要行呢個「熄電視令」。
Kenneth話，佢屋企部電視機有密碼鎖功能，佢預校咗個密碼，咁囝囝就唔可以自己開電視睇，但囝囝都有撞中密碼成功解鎖嘅時候，惟有頻密啲改密碼。由於囡囡功課唔錯，間房嘅電腦有得無限上網，細佬都會入去偷偷上網，家姐有時都會配合Kenneth，用密碼將部電腦鎖住。
另外，Kenneth呢排研究緊財務匯報局上個月發表嘅獨立審計監管改革報告，話會計界唔介意交出公會紀律聆訊嘅調查、檢控同懲處權，不過就應該交由獨立嘅審裁處做，以免財匯局獨攬大權喎。