政情：出氣波 罵不還口
涉及民生嘅爭議性課題推陳出新，港府問責團隊走入群眾爭取各方支持已是不可或缺，早前陷入囤地風波嘅發展局局長陳茂波（Paul），最近稍為喘定後終主動出擊，接連落區推銷新界東北發展計劃，包括親赴受影響嘅村落同持份者對話，期間當然少不免要受到責難批評。至少阿Paul有政治勇氣，乖乖落區，「打不還手，罵不還口」，可以收到最小嘅效果，就係畀受影響嘅村民消消氣。
發展局今年七月初公布新界東北發展計劃修訂方案後，阿Paul被「揭發」佢外家喺區內有地，於是遭受各方抨擊，要理性討論新界東北發展計劃細節根本係天方夜譚。不過隨住爭議丟淡，阿Paul重新出發，化被動為主動，先後視察古洞北同粉嶺北等地，期間少不免要同受影響人士短兵相接，另外有示威人士亦聞風而至如影隨形，幸好小小嘅擾攘未演變成重大事件。
議員教直接對話
究竟阿Paul突然勇猛落區有乜因由呢？據悉阿Paul較早前曾私下向建制派議員取經，睇下有乜妙計良方再推進新界東北發展計劃，較多人提出嘅，都係叫佢要乖乖落區同受影響持份者直接對話，最重要做到「打不還手，罵不還口」，阿Paul都從善如流付諸行動。
問責高官乖乖落區捱鬧畀人消消氣嘅招數，其實亦可以應用喺環境局局長黃錦星（星星）身上，事關佢最快明年第一季就要再為擴建將軍澳、屯門同北區三個堆填區闖關，剩餘可以做鋪墊工作嘅時間認真不多。
黃錦星亦應效法
有建制派中人話，星星除咗早前落區視察改裝密封垃圾車以及到長洲出席環保活動外，未見佢有乜特別招數去疏導將軍澳、屯門地區人士嘅不滿情緒，加上「好打得」嘅政務司司長林鄭月娥明年初將領軍做政改諮詢，未必能夠好似上次咁可全力統籌擴建堆填區工作，因此呼籲星星盡快乖乖落區同市民直接接觸，然後因應訴求做得幾多得幾多。正所謂「不入虎穴，焉得虎子」，唔知星星做好深入虎穴嘅準備未呢？