中環出更：范國威拒認煙剷 大戰「元秋」
食煙有損健康，但大動肝火亦唔好得幾多。立法會蔣麗芸（阿Ann）日前承認自己偶有吸煙習慣，仲話新民主同盟范國威（Gary）都有吸煙。點知Gary尋日喺開會前向阿Ann送一包「生草藥」，形容佢「噏得就噏」，阿Ann見狀反問Gary有無食過煙，兩人就咁你一句我一句互窒咗十幾分鐘。
尋日開會前，Gary攞住包寫上「元秋堂生草藥」嘅紙袋企喺會議廳門口，諗住等阿Ann行入會議廳時交畀佢。當阿Ann行近會議廳，Gary試圖上前將包生草藥交畀阿Ann，矢言自己無食過煙，又批評阿Ann嘅言論無事實根據，咁講對佢唔公道。
呢句隨即激起阿Ann把火，猛問Gary「你講完未？」又話自己已經大方承認曾經食過煙，唔會呃人話自己無食過。阿Ann喺理論期間仲掂到Gary嘅右肩，Gary即時大叫「你唔好掂我」。其實有咩好拗喎，成年人食唔食煙係自己選擇。兩人與其駁火，不如慳番啖氣暖吓肚好過啦。
講開吸煙，有行管會委員投訴近期成日喺立法會聞到煙味，行管會於是喺每一層樓貼上反吸煙貼紙，提醒議員同職員們唔好再喺立會大樓範圍內吸煙。
卓妮