政情：騸雞爭做超級鴿
最近盛傳南區區議員馮煒光出任新聞統籌專員，海怡西選區一旦出現空缺，民主黨同公民黨都（目及）到實，民主黨相信會派出單仲偕（騸雞）出選，公民黨就想派陳淑莊。然而，為免鷸蚌相爭漁人得利，兩黨喺第一回合協商，決定將個選區讓畀單仲偕。單仲偕咁緊張海怡個議席，其實係為咗區議會超級議席張入場券。
政改諮詢仲未開始，不過現時嘅五個立法會超級議席相信唔會大變，到二○一六年，相信只有區議員至有資格參選、再由選民一人一票選出嘅區議會功能組別議席仍然存在。政黨開始放眼三年後嘅超級議席。就民主黨嚟講，現時嘅兩人、即何俊仁同涂謹申，前者好大機會退休，後者就算再選區議會，都必會遭到其他政黨派出重炮手狙擊以斷其後路，故勝敗難料，所以個黨一定要買定保險。
區議會超級議席嘅選區係全港，參選人必須知名度高且形象唔差。睇番民主黨嘅人腳，首選係單仲偕，次選已經去到胡志偉，再數落去，唔通要出動到牽涉女助理事件、已經唔喺立法會嘅甘乃威咩？所以聞說單仲偕已經作好出選區議會嘅準備，今年唔選，咪留待兩年後囉。
勢惡鬥新民黨新人
如果涂謹申同單仲偕雙雙喺一五年嘅區議會選舉中勝出，二人都有選超級議席嘅入場券，民主黨就可以進可攻退可守，其中一個選擇係涂謹申帶一個新人出選超級議席，本來喺港島直選入立法會嘅單仲偕，就留守港島選區，拍住另一個新一代出選，喺候選人名單上仲排喺新人嘅第二位。如此部署，可以捧出兩個新人，令新一代成功接班，如果單仲偕贏埋，港島又可以多一個議席進帳。
不過，紙上談兵當然容易，現實又邊有咁理想？南區海怡西呢個空缺，覬覦嘅又點只民主黨同公民黨？已經擺明車馬要去選嘅，仲有新民黨嘅新人陳家珮。呢度要講番少少背景，馮煒光一一年成功連任，只係以十二票之差贏咗新民黨嘅施俊輝，所以新民黨喺呢區，唔係完全無基礎o架。