中環出更：黃傑龍赴日取經 驚見「洪七公」
東瀛經濟仲係麻麻，關注貧困問題嘅十大傑青黃傑龍（Simon）日前去東京公幹，喺街邊巧遇披頭散髮，十足丐幫幫主「洪七公」嘅露宿者，嚇咗一跳。Simon話，估唔到繁榮如東京大都市，一樣有人慘到露宿街頭，佢計劃喺社交網站Facebook搭建一個平台，鼓勵網友上載身邊嘅好人好事，希望集腋成裘，齊心解決全球貧窮問題。
見到露宿者感慨
遊東京多次嘅Simon，以往只留意當地食肆有乜新食材同新菜式，自從早前參加電視台節目，親身體驗貧窮滋味後，忽然對個「窮」字敏感咗，早前去到東京見到中年人露宿公園及商場內，百感交集，感同身受。不過Simon又同時發現東京比起香港嘅一個優勝之處，就係租金平好多。以銀座、涉谷等人氣咁旺嘅市中心地段為例，一個六百呎單位，月租只需約五千港元。相比之下，香港租金真係「癲價」。
不過搵蝸居都係其次，搞掂三餐最實際。Simon早前發起「代用飯計劃」助貧苦大眾，一呼百應。唔少食肆老闆及大機構齊心響應，都話希望為香港出一分力喎。
欣賞日人夠嚴謹
Simon喺香港經營唔同路線嘅食肆，菜式經常要推陳出新，咁至可以保留對顧客嘅吸引力。佢嘅食肆有部分專賣牛肉，原來佢長期幫襯日本買牛肉，因為欣賞日本人做嘢夠嚴謹喎，佢今次去東京，就係例行參觀和牛食品工場，睇佢着晒保護衣又戴咗帽入工場，相信佢搵到唔少新靈感，可以讓佢帶返嚟加以發揮。
卓妮