網民變偵探 列案中五大疑點

疑點一：BB有重量，被抱走應即時發現。網民指：「有BB同無BB，架BB車重量一定有分別，無理由畀人抱走後，推咗一段時間至知。」亦有使用同款BB車的家長稱：「依隻牌子出名夠輕身，有無BB坐，推嘅速度會好唔同！」兒科醫生指出，一般半歲大女嬰體重約十三至十五磅，但遇陌生人接觸或抱走時，未必一定會大哭大鬧。

疑點二：BB車冚到實，拐子佬難落手。網民認為，吳婦自離開住所至發現小凱晴失蹤，期間BB車均以帳篷冚到實，拐子佬要掀開帳篷再解開安全扣，始能抱走女嬰，「咁大陣仗，難度及風險都高，父母好易察覺。」

疑點三：包到冚推得快，根本無B？有全職媽媽留言指：「除非強風或者好凍，否則唔會咁樣焗住個B！」又指吳婦母女居住大廈大門設兩級階梯及斜台，惟吳婦推車離開時速度很快，「完全唔收步，好似唔怕『櫈』親個B。」不過，亦有網民反駁吳婦是經斜台離開而非階梯。

警至今未發「拐子婆」拼圖

疑點四：吳婦連日在相若時間落街，卻不見小凱晴。網民認為吳婦早前帶女兒出街時間十分飄忽，近日則定時推BB車出街，而且是入夜時間，加上每次出街均將BB車包到實，不禁令人懷疑。

疑點五：父母案發後異常低調冷靜。「如果我係父母，咁耐都無B女消息，已經發咗癲咁周街搵，但係連日嚟傳媒都影唔到佢哋嘅蹤影。」

另外，亦有網民質疑至今仍未有人目擊「拐子婆」容貌及犯案經過；警方亦未發出「拐子婆」拼圖，令此案更添撲朔迷離。不過，目前全城最關心的，還是小凱晴的安危；在facebook「我哋要搵番個BB女」專頁，昨晚已有逾七萬八千人讚好。