全國人大常委會副秘書長兼香港基本法委員會主任李飛近日來港，同特區高官同埋政商界午宴，都用踢足球嚟比喻政改，話落場踢波始終有界線，唔理係西班牙勁旅皇家馬德里、巴塞隆拿，定係德國勁旅拜仁慕尼黑，總之如果超越球場範圍，就唔再係踢波，暗喻泛民提出嘅公民提名喺場外踢波。公民黨同工黨都有份簽署學民思潮提出嘅公民聯署約章，依家球證講到明條界線，即係話佢哋若果唔跟遊戲規則踢出界，就算個波射入龍門都唔算數，睇怕佢哋有皇馬球星C朗、巴塞球星美斯在陣都藥石無靈喇！
