政情：就快退休 區璟智仍大把嘢做
近年好多資深AO早早離開官場，不過休息一輪之後都好活躍，近年就有幾位女AO不約而同加入商會，繼續發揮所長。工作表現備受好評嘅財經事務及庫務局常任秘書長區璟智仲有一年幾就退休。我哋見佢不時出席慈善活動，唔通佢退休後想投身公益事務？
抽空參加慈善活動
尋日聯合國兒童會搞咗個慈善跑，吸引唔少名人出席。有「頭箍小姐」之稱嘅區璟智亦有出席，並以招牌髮型亮相，非常醒神。原來佢係聯合國兒童基金會委員會成員，所以當然要幫手啦。佢仲話自己喺官場多年，但每次見到班義工好熱心幫班貧困兒童，自己就倍覺感動。
區璟智過多年幾就正式退休，但五十五歲仍然大把精力，真係退休未免可惜。不過無論去向如何，區璟智退休前仍有大把嘢做，好似明年港府負責舉辦亞太經合組織財長會議，佢就要坐鎮指揮，確保無意外，睇怕退休前要舒舒服服都好難喇。