政情：「佔中刺激經濟」黃之鋒講歪理
特首梁振英尋日落區出席諮詢會，學民思潮等團體當然把握機會示威，但係我哋望極都唔多覺召集人黃之鋒喺現場，唔通佢都慳番啖氣唔抗議？原來佢應承咗中學生聯合委員會出席講政改嘅研討會，議題當然唔少得佔領中環，佢反駁佔中癱瘓香港經濟嘅講法，仲掉番轉話會刺激經濟喎。
出席研討唔熟史
黃之鋒反駁話，依家好多金融交易已經喺網上做，癱瘓中環影響未必太大，又話原來上年反國教科集會，金鐘海富中心快餐店坐爆晒人，嗰幾日去麥記連豬柳蛋漢堡都賣清光，所以話佔中隨時會刺激中環嘅飲食業。如果佢嘅歪理成立，快餐店應該去撐佔中，同埋最好喺中環開多啲分店喇！
黃之鋒尋日話，《基本法》起草嗰時無作出諮詢，冇獲得港人認受。但其實喺八十年代成立嘅《基本法》諮詢委員會徵求港人意見，佔中發起人戴耀廷仲係學界代表之一。黃之鋒都係要多讀歷史至得嘞。