政情：佔中元旦不上街

擇日再另搞音樂會

佔中元旦唔會去遊行，點解？理由竟然係擔心遊行人士情緒高漲，同佔中集會主題格格不入，所以決定另覓日子再搞音樂會喎。佔中連元旦日呢個咁方便團結市民上街嘅場合都放棄，加上早前人大常委副秘書長李飛嚟香港，佔中班發起人又無乜聲氣，唔通佢哋最近有乜特別嘅諗法？

今年七一遊行，民陣以「佔領中環，蓄勢待發」作為遊行主題，主辦單位聲稱有四十三萬人參與，警方都話有六萬六千人，唔少市民更喺遊行結束後自發留喺中環遮打道行人專用區，參加由佔中發起嘅佔中集會。不過嚟緊元旦大家唔會再見到「民陣＋佔中」呢個組合，原因就係佔中秘書處表明今次唔會夥拍民陣舉行晚間集會。

民陣：唔會強人所難

據聞佔中初時認為應該趁住元旦遊行氣勢搞大型活動宣傳佔中訊息，不過發起人之一陳健民近日改口話佔中當日唔會舉辦任何活動，因為佢哋經過一連串評估後，相信當日遊行人士情緒高漲，同主打「愛與和平」嘅音樂會可謂南轅北轍。陳健民又話依家仲有唔少團體未完成第二階段商討日，認為個別團體未必趕得切喺元旦當日上台分享經驗，所以決定最遲一月初再另搞音樂會。

民陣原定都係諗住同佔中遊行後搞集會，不過既然依家佔中秘書處唔一齊搞，佢哋亦唔會強人所難，遊行後亦會照搞集會邀請社會人士上台發言。泛民中人組合多，令人眼花繚亂，早前傳出「公民提名」四個字係不同團體參加遊行嘅關卡，喺呢個前提下，連真普聯都可能唔可以參加。民陣副召集人王浩賢否認此事，話既然大家都係泛民中人，一定會以公民提名作為終極爭取目標，相信真普聯咁多個團體會同意佢嘅講法喎。