唔少男士都深受中年脫髮困擾，就連勞工及福利局局長張建宗（小肥張）都唔例外，佢上周日出席循道愛華村服務中心成立五十周年慶典，大爆自己卅年前曾以東區民政主任身份出席該中心二十周年紀念儀式，仲喺網誌附上珍貴陳年照片，等大家重溫佢昔日滿頭秀髮、英俊瀟灑嘅後生look。
小肥張同愛華嘅淵源可以追溯至三十年前，想當年，小肥張係一個東區民政主任，已經非常關心區內弱勢社群。當時適逢港英政府要拆除柴灣道附近嘅石屋群用作房屋發展，中心主任盧龍光牧師就建議小肥張游說政府增撥資源，等佢哋可以服務更多有需要區內長者。當年精力旺盛嘅小肥張於是跑數百級樓梯上山，去中心同盧龍光當面了解計劃詳情，之後就向政府要求興建新服務大樓。佢喺網誌話如今重回舊地，出席中心金禧開放日慶典，別有一種時光倒流同好似返到屋企嘅親切感覺。
卓妮