車輛好多種，司機好多類，如果要選「最令人聞風喪膽司機」，相信一定非小巴司機莫屬。無他嘅，有啲小巴司機駕駛態度惡劣，亡命小巴惡名昭彰，一次又一次嘅奪命車禍搞到人心惶惶，其他種類嘅車輛同司機實在難攖其鋒。
當然嘞，唔能夠一竹篙打一船人，並非所有小巴司機都係駕駛態度惡劣，但只要有一小撮係咁，就足以攪壞一鍋粥喇。嗱，有啲小巴司機即使唔超速又唔撞車，服務態度都好有問題，相信唔少乘客都領教過有人黑口黑臉，上車慢少少就鬧，落車唔夠快就嘈，揚聲有落如果唔配合路面情況咩，少不免一輪問候。
既然小巴問題多多，政府係咪應該嚴格規管呢？理論上當然係啦，而且申訴專員公署早就點出關鍵所在，要求運輸署提出改善措施。運輸署係就係交咗功課，得到業界支持之後拋出司機職前培訓方案，問題係呢個方案已經係○六年嘅構思，一拖就拖足七年都未實行。七年流流長呀大佬，二千幾日如果用嚟追女仔，結埋婚生埋仔都得啦，個仔隨時讀緊小學喇！
好嘞好嘞，終於終於，運輸署最近招標承辦小巴司機職前訓練學校，明年下半年推出課程，屆時所有打算投身小巴業嘅駕駛者，必須強制報讀十六小時職前課程並且考試合格，再通過駕駛考試，先至能夠取得小巴司機執照。課程內容包括開車途中要保持禮貌，等乘客落咗車或者坐定定先至開車，保持良好嘅服務態度之餘，仲要掌握正確嘅駕駛方式。
鑑於亡命小巴罔顧乘客及其他道路使用者安全，最駭人聽聞嘅係○四年有兩名司機為咗搶客而衝燈飛車炒大鑊，造成兩死十七傷，政府已經強制所有公共小巴安裝限速器，亦要安裝俗稱「黑盒」嘅數據記錄儀，去年涉及小巴嘅意外數字的確比前年下降約百分之七。之但係咁喎，路上零意外，香港人人愛，意外減少係唔夠o架，必須進一步防止小巴炒車。
所以咯喎，遲到好過冇到，強制新入行小巴司機報讀職前課程再考路試，實在係有必要o架。不過有一家嘢值得憂慮，運輸署招標唔一定有人承辦喎，正如業界人士話齋，暫時未有承辦商有意開辦相關課程，計劃最後可能胎死腹中o架。喂喂喂，萬一真係胎死腹中點算先？運輸署有冇後備計劃？即使有後備計劃，會唔會又拖足七年呀？
其實講真吖，揸小巴搵食固然該當讀書考試，負責管理交通事務嘅運輸署官員亦應接受培訓，改一改拖拖拉拉嘅陋習。特區政府嘅施政作風受到前特首曾蔭權爵士感染，早就變得效率奇低，係時候撥亂反正嘞。不如咁啦，招標承辦懶散官僚更生培訓學校，從速招生！