立法會購買嘅公眾責任保險快將要續保，一班議員尋日傾開續保問題時就提起，立會有幫職員買勞工保險，市民喺立會受傷亦可經公眾責任保險索償，但議員萬一喺大樓內受傷、或是因公務外出視察時受傷，都係追討無門，於是有人建議為議員購買意外保險。不過，有議員擔心購買呢個「議員專用保險」會被人話「恃住做議員特別矜貴」同亂使公帑，所以最後都打消念頭。
立法會經常都有市民、學生去參觀，如果有人喺大樓內受傷，而證實立法會有過失及責任，就可向立法會索償。由於立法會冇特別為議員買保險，所以勞工界前議員李鳳英當年喺中環舊大樓碌落樓梯，搞到盤骨移位，都只能夠用同一途徑同立法會及政府打官司索償。不過，基於打官司又要畀訟費，為免兩敗俱傷，當時都係庭外和解。
有議員有見及此，就提出由立法會為議員購買意外保險，但有人擔心涉及公帑開支，可能又被外界批評亂使公帑，加上議員本身已可用每月三萬多元嘅醫療津貼買醫療保險，所以最後大家決定多一事不如少一事喇。