政情：李嘉誠支援培訓內地女村官
李嘉誠基金會舉辦嘅「展璞計劃」，尋日舉行啟動儀式，基金會主席李嘉誠親身去到陝西省咸陽市渭城區大石頭村，與民政部副部長竇玉沛及陝西省高層官員齊出席啟動儀式，與三十名當地女村官交流，佢哋仲同曾受惠培訓計劃嘅廣東及廣西女村官傾偈，了解佢哋如何透過高校培訓和遠端學習，實踐改善社區的計劃。
基金會原本早於一○年已捐資人民幣二千二百幾萬元，推出「啟璞計劃」，為超過四千三百名女村官提供教學培訓，今次再投入人民幣二千萬元開展「展璞計劃」，喺湖南、陝西、新疆、廣東等省份，提高四千多名女村官喺村莊管理及農村經濟發展嘅領導力。
指農村婦女不容忽視
所謂女村官，係指由村民委員會經一人一票直選嘅女性正副主任，以及村黨支部女性正副職書記，佢哋都係農民，但沒有機會入大學。李嘉誠話，中國婦女，特別係農村婦女，係未來重要嘅角色，佢哋嘅潛能和精神力量不容忽視，支援農村婦女提升知識及管理能力，係未來一支強力愛心針。