政情：犯國規唔認錯收警告信

唔聽勸 當正無掩雞籠

立法會本月初辯論用特權法要求政府交出審批發牌嘅文件，當日政府總部同立法會大樓外有大批撐發牌嘅人士聚集。Gary當晚就帶咗十個留守政府總部嘅香港電視網絡員工，去立法會議員休息室嘅沖涼房沖涼。由於休息室係議員專用，當時有立法會保安員就勸喻范國威，但佢就冇理會，仲趕走保安員添！除咗佢之外，當晚莫乃光亦都有份帶人去議員休息室沖涼，完全當正立法會係無掩雞籠。

行管會尋日開會討論事件，並裁定議員帶人去休息室沖涼係違規。

莫乃光有份 知衰道歉

莫乃光就解釋話，當日咁啱喺休息室外遇到議員「長毛」梁國雄嘅助理，基於人道理由先至安排長毛助理入去沖涼，而佢亦都就今次違規向行管會致歉。不過，范國威依然死撐，仲建議立法會加多幾格沖涼房，方便日後帶人去沖涼，由於佢當日趕走保安員，行管會就決定向佢發警告信，日後亦會喺休息室當眼處張貼告示提醒議員。

至於辯論特權法動議當日，一班泛民議員在會議廳外請願，將收集到嘅撐發牌市民簽名同「誠實豆沙包」派畀建制派議員，搞到班建制派議員喺傳媒鏡頭面對尷尷尬尬，唔知接好定唔接好。有行管會委員就建議限制議員喺會議廳外表達訴求，例如唔准騷擾到其他議員同影響議員出入會議廳，咁工聯會王國興以後咪唔可以喺會議廳外寫大字？行管會委員經過一番爭論後，都係決定再各自同黨友「傾下先」喎。